In ihrer neuen Kolumne macht sich Gesa vom Plattdeutschen Zentrum in Leck Gedanken über den richtigen Umgang mit der plattdeutschen Sprache, Kunstwörtern und berichtet von einem spannenden Kurzfilm-Projekt.

Ik wull blots gau mal na en Spazeergang langs de wunnerschöne wiede Sandstrand vun St. Peter-Ording na de öffentliche Toilette in’t Wellenbad rin. Jüst dör de Döör dör gluupt mi en umbi een Meter grote Fischstäbchen vun en Pinnwand entgegen, ik kunn dor gor nich an vörbikieken. „Wenn Ihnen das Fisch genug ist, kann Ihnen die Nordsee auch egal sein.“ Dat föhl sik an, as wenn dat Plakaat egens för mi ophungen worrn weer, as wenn dat dor op mi luert harr. Nich, dat mi de Nordsee egaal weer, ganz un gor nich! Aver to de Tiet höörte ik to de Slag Lüüd, de sik in en Lokaal as Fischgericht hööchstens sowat as „Käpt‘n Blaubär“ bestellen worrn, wiel se egentlich gor keen Meeresbewohner daalkriegen. Sietdem eet ik nich blots keen „richtige Fisch“, sunnern ok keen paneerte Sticken mit Meeresfüllung mehr. „Mission Nordsee“ – tominnst en lierlütte beten mehr – erfüllt!

Op Kuschel-Niveau

Dat is wiet över twintig Johr her. Worum geiht mi dat jüst nu wedder dör de Kopp? Wiel ik in de Kniep bün. Villicht so ähnlich, as de Organisatschoon domals vunwegen de Nordsee. Wiel ik bang bün, dat dor wat in en verkehrte Richtung löppt. Mi geiht dat um Plattdüütsch. Ik freu mi över de Fohrt, de dat Interesse an de Spraak in letzte Tiet opnahmen hett. Dat se vun ümmer mehr Lüüd bewusst wohrnahmen un schätzt warrt. Aver mennigmal ok ünnerschätzt. Ehr „nüüdlich“, „kommodig“ un „eenfach netter“ to finnen langt nich – un wi weten opto all vun wokeen „nett“ de lütte Swester is. Wer sik op Kuschel-Niveau mit sien Sympathie för de Regionalspraak inrichtet, nimmt Plattdüütsch nich för vull un wertet de Spraak dormit af – wenn ok nich mit Willen. Un miteens ok de Minschen, de Platt sülvstverständlich snacken un wiedergeven. Un mal ganz in’n Eernst: De Plattsnackers is in jemehr Alldag ok nich jümmers kommodig tomoot!

Plattdüütsche Kunstwöör

Nu mien Plaan: Ik seh en Plakaat vör mi mit nix as en grote Handy op. Un dor över schreven steiht: „Wenn di ‚Ackersnacker‘ Platt noog is, denn kann di de Spraak ok enerlei ween.“ Du finnst dat to groff? Ja, temlich düütlich is dat. Wenn’t man bi een helpen worr – goot, geern ok bi en poor mehr, so as bi mi mit de Fisch, denn weer dat jüst dat richtige Maat. Dat schull Lüüd, de sik för „Waterköter & Co“ begeistern, nich to dull vör de Kopp stöten, aver to‘n Nadenken anregen. Dor över, wat se mit platte plattdüütsche Kunstwöör unse Spraak för en Ansehen geven. „Mission Plattdüütsch“ – tominnst en lierlütte beten mehr – erfüllt?

Kalenner för jede Wuch

Dat gifft so vele Wöör un Utdrücke, de över de Tieden in de plattdüütsche Spraak rinwussen sünd. To „Wöör mit Wutteln“. Ünner düsse Titel gifft dat en Kalenner-Reeg, de dat Instituut för Nedderdüütsche Spraak ut Bremen (INS) in de letzte Johren opleggt hett. För jede Wuch gifft dat en Woortgeschicht to Bedüden, Bruken un Herkamen vun en Woort oder Utdruck. Richtig spannend! De Kalenner kann man sik af August över klenner@ins-bremen.de för dat nächste Johr bestellen.

Ran an en Kamera

Un nu kamen jem! Ünner dat Motto „Platt mit Plie“ gifft dat jüst en Oproop bi de PLATTSPOTS-Wettstriet mittomaken. Söcht warrn korte Filme mit Witz un Verstand, de wiesen, dat Platt en besunnere Geist – „Plie“ even – hett. En plietsche Handlung, ganz unopgeregt op Platt vertellt, passt jüst so to dat Motto, as ok drieste Ansichten över de Spraak, wenn se kreativ un mit en gode Maat an Respekt verpackt sünd. Also: Ran an en Kamera, kann ok de vun’t Handy sien, un bet to de 1. August 2022 en Spot inlangen, de nich länger as dree Minuten is. Wenn du nieschierig worrn büst un mehr weten muchst, kiek in’t Nett ünner www.plattspots.de. En Jury ut Filmemakers un Plattkenners söcht de Films ut, de bi de Flensborger Kortfilmdaag denn op en echte grote Kinolienwand wiest un mit Priesen uttekend warrn – wenn dat nix is?!

Hartlich gröten deit
Gesa

Du hast Lust, Gesas Text auch zu hören? Dann gibt’s hier noch einmal Plattdeutsch auf die Ohren:

Teile es mit deinen Freunden!

Jetzt Zweitwohnsitz anmelden und Klönstedter:in werden

Du fühlst dich richtig wohl in Klönstedt und möchtest nicht nur ab und zu vorbei schauen, sondern einen festen Wohnsitz in unserem digitalen Dorf haben?

Dann melde ab sofort deinen Zweitwohnsitz in unserem Abobereich an! Dort warten viele Mehrwerte auf dich – von Masterclass über Storyteller-Boxen bis hin zu exklusiven Inhalten und Klönstedt-Netzwerk.

werde Klönstedter:in!