Wat is dien Drift?

Was treibt dich an? Unter diesem Motto steht das Barcamp vom Plattdeutschen Zentrum Leck am 25. März 2023 (23. März 2024). Autorin Gesa Retzlaff erklärt, was das überhaupt ist, worum es geht und lädt herzlich ein. Außerdem hat sie die Plattkenntnisse von ChatGPT auf die Probe gestellt…

Wat is dien Drift? Düsse Fraag stellen wi de Lüüd, de an de 25. März (23. März 2024) vun Klock teihn bet bummelig Klock fief to dat platt drift barcamp na Leck in Noordfreesland kamen. Du weetst nich wat Drift meent? Dat Woort hett op Platt bannig veel verscheden Bedüden. Kickt man in’t Nettwöörbook na, kriggt man en Utwahl vun knapp veerdig direkte Drepers vörslagen. De Bedüden, um de dat bi unse Fraag geiht, liggt neeg bi dat engelsche Woort drive, in’n Sinn vun Antrieb/Motivation: What is your drive? Man kann seggen: Hest du Drift, bist du Füer un Flamm för jichtenswat, denn büst du ieverig bi de Saak.

Du hest noch nie nich wat vun en Barcamp höört? Dor warrt ok Unkonferenz to seggt. Dat is en Drapen (oftmals över mehre Daag un mit Övernachten – dorüm camp), wo Lüüd tosamenkamen, de för jichtenswat brennen. Un de ehren Drift mit anner Lüüd delen wüllen. De Sülv Bar kummt ut en Programmeerspraak, warrt bruukt as Platzholer, un bedüüt „irgendetwas Beliebiges“. Dat gifft also keen fasten Plaan för Themen. De Veranstalters sorgen för de Rahmen un de Deelnehmers levern dat Programm. Dat löppt mit Sessions vun bummelig 45 Minuten, de vörslagen warrn. Dat könen Vördrääg sien, wat to‘n Mitmaken oder annerswat. Man seggt ok „plaant nich plaant“ to düt Format. Ideen sammeln, delen, uttuuschen, snacken, wat mitnehmen, wiedergeven, nie’e Lüüd un ehren Drift kennenlehren – nettwarken even. 

Unse Barcamp hett nevenbi, oder anners seggt: sülvstverständlich ok dat Thema Spraak. Jeedeen is inlaadt sik op Platt to bedeligen, wiel se oder he dat al snacken kann, sik truut dat uttoproberen oder eerstmal noch blots mit de Ohren dorbi is. Blots de Ohren bruukst du bi de Meditatschoon na de Middag. De maakt Lisa vun eat.platt.love mit uns. De ganze Dag över gifft dat wat to eten un to drinken. Kosten? Deit dat nix. Un? Nieschierig worrn? Denn mell di fix an: platt drift barcamp – Anmeldung (lets-meet.org)

Nieschierig worrn bün ik vör korten op ChatGPT. Dat süht dorna ut, as wenn düt Programm, dat künstlich klook maakt worrn is un ümmer noch klöker warrt, sämtliche Rebeden, för de Texten produzeert warrn, düchtig umkrempeln warrt. Schölers un Studerenden laten sik jemehr Huusarbeiden chatten, Schrieverslüüd verleren ehr Existenzen un mööt quer in Mangelfächer instiegen, Keerls as Steve Jobs un Elon Musk sammeln noch mehr Daten, Geld un Macht. Un ik? Heff mi liekers anmellt… As eerstes wull ik geern weten, wat he (na mien forschen is so en System, dat vullfodert mit Daten mit eens „snackt“, männlich) Plattdüütsch kann. Antwoort: „Ich bin programmiert, um viele Sprachen zu verstehen, einschließlich Plattdeutsch. Bitte schreiben Sie Ihre Frage oder Nachricht und ich werde mein Bestes geben, um sie zu beantworten.“  

Na denn: Wat is dien Drift? Antwoort: „Es tut mir leid, aber ich bin mir nicht sicher, was Sie mit „dien drift“ meinen.“ Harr he man de eerste Afsatz vun düsse Klönstedt-Kolumne al intus hatt. Aver de Antwoort gung noch wieder: „Könnten Sie bitte mehr Kontext angeben oder Ihre Frage klären, damit ich sie besser verstehen und eine hilfreiche Antwort geben kann?“ Fründlich un bemöht is he över de Maten. Ik kloor also de Fraag sodennig op: Was ist dein Antrieb? Antwoort: Als künstliche Intelligenz habe ich keinen eigenen Antrieb im menschlichen Sinne, da ich keine persönlichen Bedürfnisse, Ziele oder Emotionen habe. Meine „Motivation“ ergibt sich aus der Programmierung und den Anweisungen, die ich von meinen Nutzern erhalte, um ihnen bei der Lösung ihrer Probleme und Fragen zu helfen. Mein Ziel ist es, nützliche und präzise Antworten zu geben und meine Fähigkeiten ständig zu verbessern, um den Bedürfnissen meiner Nutzer gerecht zu werden.“ En Ding. En Daten-Dener. En Drift–Deef? 

Deepdenkern Gröten 

Gesa 

Unsere Autorin Gesa Retzlaff hat den Beitrag für dich auf Plattdeutsch eingelesen: